ຫຼັກສູດນີ້ ແມ່ນແນະນຳໃຫ້ຜູ້ເຂົ້າຮ່ວມໄດ້ຮັບຮູ້ຕົ້ນຕໍກ່ຽວກັບວັດທະນະທຳຈີນ, ໂດຍສຸມໃສ່ສະເພາະກ່ຽວກັບວັດທະນະທຳການດໍາເນີນທຸລະກິດ ແລະ ທໍານຽມປະຕິບັດກ່ຽວຂ້ອງກັບການດໍາເນີນທຸລະກິດ. ຫຼັກສູດ ຈະເລີ່ມຕົ້ນຈາກພາບລວມຂອງວັດທະນະທຳໂດຍລວມ ແລະ ຍົກບັນຫາທ້າທາຍຕໍ່ຜູ້ເຂົ້າຮ່ວມໃຫ້ພະຍາຍາມ ແລະ ເຫັນໄດ້ເຖິງບາງຄວາມເຂົ້າໃຈທີ່ມີກ່ຽວກັບວັດທະນະທຳຂອງພວກເຂົາ ແລະ ຈຸດບອດຕ່າງໆ ເພື່ອເບິ່ງການສື່ສານທາງດ້ານວັດທະນະທໍາຈາກອີກມຸມມອງໜຶ່ງ. ຈາກນັ້ນ, ຫຼັກສູດນີ້ ຈະສືບຕໍ່ກ້າວໄປສູ່ການສົນທະນາກ່ຽວກັບຄຸນລັກສະນະທີ່ເປັນມູນເຊື້ອຂອງວັດທະນະທຳຈີນ, ໂດຍສຸມໃສ່ແນວຄວາມຄິດກ່ຽວກັບລະດັບຊັ້ນຄົນໃນສັງຄົມ ຫຼື mianzi ("ຫນ້າຕາ") ແລະ guanxi (ສາຍພົວພັນຂອງເຄືອຂ່າຍ), ໂດຍສະເພາະ ໃນສ່ວນທີ່ພົວພັນກັບການດໍາເນີນທຸລະກິດໃນປະເທດຈີນ. ສຸດທ້າຍ, ຫຼັກສູດນີ້ ຈະນໍາສະເໜີ ຫຼາຍສະຖານະການ ແລະ ຮຽກຮ້ອງໃຫ້ຜູ້ເຂົ້າຮ່ວມກໍານົດວິທີການປະຕິບັດທີ່ດີທີ່ສຸດໃນຫຼາຍສະຖານະການທົ່ວໄປທີ່ກ່ຽວຂ້ອງກັບການເຮັດວຽກກັບຄູ່ຮ່ວມທຸລະກິດຄົນຈີນ.

ໝາຍເຫດ: ພວກເຮົາແນະນຳໃຫ້ໃຊ້ໂປຣແກຣມທ່ອງເວັບ Chrome ຫຼື Safari ລຸ້ນຫຼ້າສຸດເພື່ອຮັບປະກັນການຮັບຊົມບົດບັນຍາຍໄດ້ແຈ້ງຂຶ້ນ.

ພາຍຫຼັງສຳເລັດຫຼັກສູດນີ້, ຜູ້ເຂົ້າຮ່ວມຈະສາມາດ:

ອະທິບາຍຄວາມສຳຄັນໃນການເຂົ້າໃຈວັດທະນະທຳ ແລະ ຜົນຕາມມາສໍາລັບການເຂົ້າໃຈຜິດທາງວັດທະນະທຳ;
ລະບຸໄດ້ບາງດ້ານທີ່ສຳຄັນຂອງວັດທະນະທຳຈີນ, ໂດຍ ສຸມໃສ່ວັດທະນະທຳໃນການດໍາເນີນທຸລະກິດ ແລະ ທໍານຽມປະຕິບັດໃນການດໍາເນີນທຸລະກິດ; ແລະ
ກຳນົດບາງຍຸດທະສາດທີ່ມີປະສິດທິຜົນໃນການພົວພັນກັບຄູ່ຮ່ວມທຸລະກິດຄົນຈີນໃນຫຼາກຫຼາຍສະຖານະການທົ່ວໄປ.